Ny ZAVA-KENDREN’NY Tily Eto Madagasikara dia ny hitaiza sy hanolokolo ary handray anjara amin’ny fampivelarana ny maha-olona feno ny ankizy sy ny zatovo ary ny tanora zazalahy ao aminy ho vavolombelon’i Jesoa Kristy, ho olom-pirenena vanona, ho andrin’ny Fianakaviana.

Ny FOTOTRA IJOROAN’NY Skotisma ampiharin’ny Tily Eto Madagasikara amin’ny fitaizana ataony amin’ny Mpikambana ao aminy dia  : Adidy amin’Andriamanitra, Adidy amin’ny hafa ary Adidy amin’ny tena.

Adidy amin’Andriamanitra

-    Mino ny fisian’Andriamanitra telo izay iray
-    Miaina ny maha-Kristiana isan’ny Fiangonana
-    Mandalina ny Finoany sy ny firaisam-pinoana
-    Mitory ny Filazantsara
-    Mijoro ho vavolombelon’ny Finoana

Adidy amin’ny hafa

-    Mitia sy miasa ho an’ny Tanindrazany
-    Mampanjaka ny fahamarinana, ny fandriampahalemana ary ny fifankatiavana ao amin’ny fiaraha-monina, ny firenena ary ny iraisam-pirenena.
-    Mitandro ny maha-olona sy mikajy ny tontolo iainana.
-    Mandray anjara amin’ny fampandrosoana ny mpiara-belona.

Adidy amin’ny tena

-    Mandray andraikitra amin’ny fampivoarana ny tena sy amin’ny fiatrehana ny fiainana ankehitriny ary ny ho avy.
-    Manao izay ahatonga ho olon-dehibe mahavelon-tena ary azo anankinana andraikitra.

NY FOTO-KEVITRA ANKAPOBENY SY NY FOMBA FIJERIN’NY FOIBE TILY ETO MADAGASIKARA TAOM-PIASANA 2006 – 2010

Ny fihetsiketseham-panabeazana rehetra ato amin’ny TEM dia tokony hamaly na hamoaka ireto hatrany:

-    SKOTISMA TILY mandala mandrakariva ny foto-pisainana Skoto araka ny nanorenan’i Baden Powel azy ary mandala ny soa toavina sy ny fahendrena maha-Malagasy - “SCOUTISME FIDELE”
-    SKOTISMA TILY ilain’ny tanora amin’ny fampivoarana ny maha izy azy ary mahasoa sy mitondra fahatsaran’ny fiaraha-monina sy ny manodidina azy . - “SCOUTISME UTILE”
-    SKOTISMA TILY afaka mifampisahaza amin’ny vanin’andro diavina sy ny fivoarana misy. - “SCOUTISME MODERNE”

Ny tanjona lavitr’ezaka miainga amin’ireo dia ny hahatonga ny skotisma-Tily ho fitaovana iray mahomby eo amin’ny fandraisana anjara amin’ny fampandrosoana ny fiaraha-monina amin’izao vaninandro diavina izao ary koa hahatonga ny skotisma Tily ho tohana sy andry iray lehibe eo amin’ny fiainan’ny tanora miaina azy hiatrehany ny fiainan-koaviny.

Ireo kendrena hahatratrarana izany dia ny :
-    Fampitombona ny ambaindain’ny fikambanana : fitomboan’isan’ny Mpikambana, firotsahana amin’ny sehatra hafa ankoatra ny mahazatra.
-    Fandraisana anjara mivantana amin’ny fampandrosoana
-    Fisian’ny loharanom-bola ho enti-manohana ny asa atao
-    Fandraharahana hentitra sy mahomby eo amin’ny fitantanana ny fikambanana
-    Fitantanana sy fanofanana mifandraika amin’ny filàna, ho an’ny tompon’andraikitrarehetra eto amin’ny Fikambanana
-    Fitaizam-panahy mirindra miainga aty amin’ny tompon’andraikitra hatrany amin’ny beazina, Fitoriana ny Filazantsara amin’ny fomba skoto.
-    Fananana tompon’andrikitra sy ankizy beazina môdely eo amin’ny maha-skoto azy